FBI Dy Director McCabe a bang

US-a Federal Bureau of Investigation (FBI) Deputy Director Andrew McCabe chu Thawhṭanni khan a bang.

Andrew McCabe hi March thlaah pension-a chhuak tawh tur a ni a, mahse a chawlh hun thlen hmain a bang a ni. White House press secretary Sarah Sanders chuan McCabe a ban chungchangah hian President Donald Trump chuan inhnamhnawihna a nei lo tih a sawi.

McCabe hi kum 1996 aṭang khan FBI-ah hian a thawk tawh a ni. Kum 2016 President thlan dawna Democratic presidential candidate Hillary Clinton-in secretary of state a nih laia official thila a private email a hman chungchang pawh FBI hian a chhui a, Clinton-i hi thubuai engmah siamsak a nih loh avangin Republican candidate Donald Trump chuan mimal takin McCabe pawh hi a lo sawisel tawh a ni.

Nikum May thlaa FBI Director James Comey ban a nih hnu khan President Trump chuan McCabe hi Oval Office-ah a lo hmu tawh a, 2016 President thlanah tunge a vote tihte pawh a zawt a ni. Trump chuan a twitter-ah McCabe-a nupui chu Clinton-in a duh ang anga a tihkual theih nia sawiin, McCabe hian Clinton-i chungchang chhuina chu dik takin a kalpui theih a rin loh thu a sawi.