NKorea-in joint event neih tur a ṭhulh

North Korea chuan Winter Olympics neih hmaa South Korea nena joint cultural performance an neih tur chu a ṭhulh.

Korea ram pahnihten joint cultural programme neih an tumna hmun hi ramri bul, North Korea rama Mount Kumgang a ni a, February 4, Pathianni-a neih tura ruahman a ni.

North Korea chuan joint event neih tum a ṭhulh thu hi Thawhṭanni khan fax hmangin South Korea a hriattir a, a ṭhulh chhanah South Korea media-te chu puhin, North chungchanga an thu chhuah danahte a lungawi loh thu a sawi.

NKorea sorkar chuan South media-te chu event an neihdun tum chungchangah thu dik tawk lo chhuahah a puh a, an ram chhunga event an neih chungchang, February 8-a military parade neih tura an inbuatsaihna an thehdarh danah a lungawi lo a ni.

South Korea media-te chuan PyeongChang Olympic Games ṭan hma nia NKorea-in military parade puitham tak neih a tuma a inbuatsaihnate chu satellite hmanga an thla lain an lo tihchhuah sak fo a ni. South Korea politician ṭhenkhat chuan military parade neih tum hi an sawisel a ni.

Tun thla tir lama Korea ram pahnihten inbiakna an neih hnuah, North Korea hian South Korea-a Winter Olympics neih tura infiammi leh palai tirh a remti a, ram pahnihte hian women ice hockey team-ah infin an remti bawk. Hei bakah hian an ram infiammite chu flag pakhat hnuaiah kalho tir an rel bawk a ni. Olympics neih hma hian inpawhna ṭha zawk an neih theih nan joint cultural programme hi buatsaih an tum a, mahse North lam hian a ṭhulh leh ta a ni.