Myanmar laka hma la turin Blinken-a'n ASEAN a ngen

Myanmar rama sipai rorelna titawp a, tharum thawhna leh democracy tungding leh tura hma la turin US Secretary of State Antony Blinken chuan Southeast Asia ramte a ngen.

February 1-a Myanmar rama civil sorkar paihthlak a nih hnua tualchhung buaina thleng mekah, boruak ṭha a awm theihna turin Association of Southeast Nations (ASEAN) chuan palai hna a thawk a ni.

Nilainia ASEAN foreign minister-te nena video conference an neihnaah, Blinken chuan April thlaa inremna thuthlung panga an neihte chak taka bawhzui turin ASEAN ramte chu chahin, Myanmar tan special envoy ruat turin a ngen nghal bawk niin state department spokesperson Ned Price chuan a sawi.

Myanmar civil sorkar paihthlak a nih aṭang khan tualchhungah buaina lian tham tak tak a thleng fo a, sipaite hian lungawi lohna lantirte zinga mi 800 chuang that tawhin, mi 1000 chuang an man tawh a, ramriah buaina an tawk chho fo bawk a ni.

Blinken chuan dik lo taka an mante chhuah zalen tura ngenin, Myanmar-a rorelna inthlak chu mipui duh dana kalpui leh turin a ngen tih Price chuan a sawi a ni.