UAE-in Israel-a a embassy hawng

United Arab Emirates (UAE) chuan nimin khan Israel rama a embassy chu a hawng ta.

Embassy hi Tel Aiv Stock Exchange buildingah a awm a, embassy hawnna inkhawm hi Israel presi­dent Isaac Herzog chuan a hmanpui a ni. UAE hi Arab ram zingah Israel ram pawm a, inzawmna siampuitu ram pathumna a ni. Israel chuan June thla khan UEA-a a embassy chu a lo hawng ve tawh bawk a ni.

UAE ambassador Mohamed al-Khaja chuan embassy hawn a ni ta chu ram pahnihte inlaichinna kawngah mel lung pawimawh tak a ni tih sawiin, UAE leh Israel chuan an ram pahnih tan chauh ni lo, an chhehvel ram tan pawh hlawkpuina tur thawhdunna ṭha an neih zel a beisei thu a sawi.

Israel President Her­zog pawhin UAE nen hian hriatreng tur inremna an siam tih sawiin, Israel nena boruak ṭha siam duh ram dangte pawh inremna an siampui thei reng tih a sawi bawk.

US President hlui Donald Trump hmalakna leh ruahmannain Israel leh UAE hian nikum khan thawhdunna tur inremna, 'Abraham Accords' chu an ziak a ni. UAE hnuah hian Israel chuan Bahrain, Morocco leh Sudan ramte chu inlaichinna a siampui ve leh a ni. He thil hian Palestinian mite a ti thinur hle thung.