SAfrica tualchhung buaina vangin mi 70 chuang thi

South Africa president hlui, Jacob Zuma man anih avanga amah ṭantuten lungawi lohna an lantir avanga tualchhung buaina chhuakah mi 70 chuang an thi tawh a, mi tam takin hliam an tuar tawh bawk.

Gauteng leh KwaZulu-Natal province-ahte buaina hi a chhuak nasa zual a, mipui lungawi lote hian dawr leh sumdawnna hmunte rawkin an suasam nasa hle. Police-te chuan venhimna thawhnaah police-te pui turin sipai 2,500 chuang dah a ni tawh tih an sawi.Police-te chuan buaina chhuak kaihhnawihah 1,200 chuang an man tawh a, an zingah hian a huaihawttu zinga mi 12 an tel tih an sawi bawk.

President Cyril Rama­phosa chuan kum 1990 chho hnua an rama tualchhung buaina thleng rapthlak ber niin a sawi. Buaina siamtute hian kawngpui te an dan bakah, ei leh in zawrhna dawr leh warehouse-te an rawk nasa hle a, minister-te chuan hetianga rawk chhunzawm zel a nih chuan food supply lamah harsatna a awm thei mai dawn niin an sawi.