Delta variant hian chak takin khawvel a kangkai mek : WHO chief
World Health Organization (WHO) director-general, Tedros Adhanom Ghebreyesus chuan Covid-19 Delta variant chu chak takin a darh mek nia sawiin, mitinte fimkhur turin a chah.
"Kar hmasa kha khawvel puma a zawna Covid-19 hri a darh chhoh lehna kar lina a ni. Hri vanga thi kar 10 chhung an tlakhniam hnuah thi zat an rawn pung leh ṭan a ni," tiin Tedros chuan Geneva-a virtual press conference a neihah a sawi.
Delta variant hi October 2020 khan India ramah hmuhchhuah a ni a, ram 104 ah variant thar hi hmuhchhuah a ni tawh a ni.
Khawvel ram hruaitute chu hri leng mek an hmachhawn dan te a inang lo hlawm hle a, France chuan khuahkhirhna khauh zawk an siam laiin ram ṭhenkhat erawh chuan khuahkhirhna hi an thlahdul chho mek thung. United Kingdom (UK) chuan July 19 aṭang chuan khuahkhirhna dan a siam zawng zawngte hlih vek a tum.
WHO chief chuan hri darh mek kara khuahkhirhna thlahdul chu a la him loa ngaiin, ram tam tak chuan an rama mipui daih khawp tur vaccine pawh an la hmu zo lo niin a sawi bawk.
"Tuna kan ruahman dan hi chu kangṭhelhtu pawl in ram kang zau tak ṭhelh mih a tum ang hi kan ni. Ramri lo sial hian kangmei chhuak chu a zia awm phah maithei, mahse khawihmunah pawh kang mei a la chhuah reng chuan hmun dangah kang kaiin, a si per hian mei nasa zawk a chhuah leh thei a ni," tiin WHO chief chuan a sawi.
Tedros chuan sorkarte chu ram dangte tana vaccine pe tura ngenin, "Hmun tin maia hripui leng titawp tur chuan khawvel hi kan ṭanrual a ngai a ni," a ti.