Kenya eptu hruaitu 'people's president'-ah inpuang

Kenya rama eptu pawl lian ber hruaitu, Raila Odinga chu an ram mipuite president, 'people's president'-ah inpuangin, Thawhlehni khan president atana lakluh inkhawm hi an ram khawpui, Nariobi-ah an buatsaih.

Raila Odinga lakluh inkhawm buatsaihah hian amah thlawptu mi tam tak an tel a, mahse sorkar chuan he hun buatsaih hi an ram phatsannaah a ngaih thu a sawi. Odinga lakluh inkhawm hi TV lama tihchhuah a nih loh nan thuneitute chuan TV station-te pawh an khar tir vek a ni.

Nikum November thla khan Kenya President Uhuru Kenyatta chu a term hnihna atan president-ah hian lakluh a ni. October thlaa inthlan ṭhat buatsaihah Kenyatta hi a chak a, mahse he inthlan hi Odinga kaihhruai eptu lam chuan an boycott a, Kenyatta tlin pawh chu an pawm lo tih an sawi.

Nairobi-a inkhawm buatsaihah Odinga hian a kut dinglama Bible kengin, thuneitu sang zawkten Kenya ram mipuite president tura an ngenna chu a chhang ta niin a sawi. Mipuite chuan inthlan felfai lo leh tihchingpen ni ṭhin chu an ning tawh a, tuna president tura lakluh a ni chu an rama democracy tundinna tur a ni, a ti. Odinga hi inkhawm buatsaihah hian minute 20 vel awmin, thu tiamin a hming a ziah hnan a, hemi hnu hian stage aṭang hian a kalsawn nghal a ni. A deputy Kakonzo Musyoka pawh a tel lo a, nidangah lakluh a la ni dawn niin Odinga chuan a sawi.