Italy-ah Covid-19 vanga thi pun belh

China dawta Covid-19 tuar nasa ber ram Italy-ah hian he hri vanga thi hi an pun belh a, darkar 24 chhungin mi 189 aṭangin mi 1,016 an thih hman thu leh, thi punna zat hi 23% a nih thu Italy Civil Protection Agency chuan a tarlang.

A hmain Italy-ah he hri kai zat hi mi 12,462 an awm a, darkar 24 hnuah  mi 15,113 an tling tawh. Kai thar punna zat hi 21.7% a ni. China chuan Italy ṭanpui turin kawng a dap a, Ningani zan khan Italy-ah Chinese medical team te an thleng tla a, heng zingah hian doctor leh nurse an tel bawk. Surplus ventilator, protective mask, damdawi leh thil ṭul ang angte an keng thla nghal bawk a ni.

China-ah hri lengin ziaawm lam a pan hnuah ram dang a run mek a, a bikin Europe lamah harsatna a thleng nasa zual. Europe-ah hian Spain, France leh German ramte chu he hri kai nasa zual an ni bawk. Covid-19 hian ram hrang hrang stock a khawih buai chho mek a, US, Europe, Asia leh Middle East rama hmun ṭhenkhatahte inzin tawn khap a nih avang leh sumdawnna thila khuahkhirhna hrang hrang siam a nih avangin stock market a tlakhniam phah a ni.

Indonesia sorkar chuan ramdanga hmaituamna thawn chhuah a khap rih. Hmaituamna hi ramchhung mipuiten an mamawh ve reng avang leh, ram danga an thawnchhuah chuan mipuite mamawh indaih lohna a thlen palh a hlauhthawnawm avangin thawnchhuah hi khap a ni rih dawn tih trade minister Agus Suparmanto chuan a sawi. Ramchhung mipuiten an mamawh ang a awm dawn tih hriatchian a nih hma chuan he khapna hi hman a ni ang.

Covid-19 leng vangin Nepal sorkar chuan nimin aṭang khan khawvela tlang sang ber, Mount Everest chu April 30 thleng atan a khar a, tlang lawn phalna a pek pawh a tihtawp nghal. China pawhin an ram lam aṭanga Everest tlang lawng hi a lo khap tawh bawk. 

Nepal tan Everest tlang hi sum lakluhna pawimawh tak a ni a, tlang lawn turte hnena permit a pek ṭhin aṭang hian kum khatah US dollar maktaduai 4 te a hmu thei ṭhin. Mahse hri leng avangin tlang lawn a khap rih dawn a, a sum lakluh pawh a tlakhniam phah hle rin a ni. Nepal-ah hian Covid-19 kai hi mi pakhat hmuh a ni.

China ram tih loha Covid-19 darh zualna ram zinga mi, South Korea-ah chuan hri kai thar zat hi a tlahniam ṭan tawh. Kar thum liamtaa hri kai an hmuh ṭan hnua a vawi khatna atan nimin khan he hri kai thar aiin hri kai enkawl dam, damdawi-in aṭanga chhuah tir an tam zawk. 

Korea Centers for Disease Control and Prevention (KCDC) chuan nimin khan Covid-19 kai thar hi mi 110 awmin, he hri kai hi mi 7,979 an tling tawh a ni. Mahse nimin vel khan hri kai enkawl mek zinga mi 177 chu enkawl dam an nih avangin damdawi-in aṭangin chhuahtir an ni bawk. 

World Health Organization (WHO)-in a tarlan dan chuan Covid-19 hi ram 123-ah a darh tawh a, ram 77-ah he hri hi a la darh lo. Ram 55-ah he hri kai hi mi 10-aia tlem an awm thu pawh tarlan a ni bawk. WHO Director-General Tedros Adhanom Ghebreyesus chuan heng ram la kai ve lote leh mi 10 aia tlem kaina ramte  hi uluk taka inveng turin a hriattir. Nimin thleng khan khawvel pumah Covid-19 hi mi 132,567-in an kai tawh a, mi 4,947-in he hri hi an thih pui tawh thu WHO chuan a tarlang.