US President inthlan result chhiar a ni
US President thar thlanna, November 3-a neiha vote tlate chu chhiar mek a ni a, he chanchin buatsaih thleng hian result kimchang hriat theih a la ni lo.
Hriat tawh chinah Democratic presidential candidate Joe Biden chuan electoral college vote 538 aṭangin vote 238 a hmu tawh a, Republican presidential candidate Donald Trump chuan vote 213 a hmu tawh bawk. President tling tur hian electoral vote 270 hmuh tlin a ngai a ni.
Result puan tawh chinah Biden hian popular vote 68,966,472 hmu tawhin, Trump hian 66,717,870 a hmu tawh. Candidate-te chak tawhna state-te chu :
American-Muslim in Biden duh zawk
Muslim civil liberties and advocacy organisation-in survey a neihah, American-Muslim zinga 69% in Biden an vote a, Donald Trump thlawptu chu 17% chauh an awm tih a tarlang.
Muslim civil rights and advocacy organization lian ber, Council on American-Islamic Relations (CAIR) chuan zirchianna an neih result hi nimin khan an tichhuak a ni. CAIR chuan kumin inthlanah hian American Muslim-ten inthlan dang zawng aiin vote an thlak ṭha tih sawiin, record an siam niin a sawi.
US-ah hian Muslim mi maktaduai 3.45 vel an awm a, America ram mipui zinga 1.1% an tling pha a ni.
Kum 24 hnuah Arizona-ah Democrats chak
Democrats candidate Joe Biden chu Republican chakna hmun, Arizona state-ah a chak. Kum 24 hnua Arizona-a Democratic presidential candidate a chak ṭum khatna a ni.
Arizona-ah hian mi maktaduai 7.279 awmin, electoral vote 11 a nei a ni.
An state electoral vote hi Joe Biden chuan a hui thei ta a ni.
Candidate-ten chak turah inngai ve ve
Result kimchang hriat a nih hmain candidate pahnihte chuan chak turah an inngai lawk ve ve tawh.
Donald Trump chuan inthlanah hian a chak niin a Twitter-ah a sawi lawk tawh a, vote tihchingpen awm nia sawiin Supreme Court-a thlenah a vau zui bawk. Mahse hei hi finfiahna a awm chuang lo.
Biden pawhin hnehna ropui tak chang turin an dinhmun a ṭha mek tih sawiin, amah thlawptute erawh dawhthei taka nghak turin a ti bawk.
Slovenia PM-in Trump lawmpui lawk
Slovenia prime miniser Janez Jansa chuan nimin chhun khan inthlan result kimchang hriat a nih hmain a twitter-ah Donald Trump lawmpuina a ziak.
First Lady Melania Trump ram, Slovenia PM hian America mipuite chuan Donald Trump leh Mike Pence-te chu kum li dang an ram hruaitu atan an thlang leh a ni tia sawiin, GOP chu result ṭha tak a neih avanga a lawmpui thu a sawi. Jansa hian inthlan neih hma aṭangin Trump hi a thlawp thu a lo sawilang tawh a ni.
Result kimchang hriat har chhan
Kumin inthlanah hian kum dang aiin postal vote a tlak hnem avangin vote chhiar chhung a rei a, result kimchang hriat mai theih a ni lo a ni.
Postal vote-te hi chhiar dawnin signature leh address check vek a ngai a, hei vang hian hun a duh rei a ni. Kuminah hian hripui leng avangin kum dang inthlan aiin postal vote hmanga vote thlak hi an tam a, hei vang hian vote chhiar chhung pawh a rei phah ta a ni.
Joe Biden
Kum 1942, November 20-a piang, Joseph Robinette Biden Jr hi kum 2009-2017 chhung khan Barack Obama president-na hnuaiah US vice president a ni a, 1973-2009 chhung khan Delaware Senator a ni bawk.
University of Delaware aṭanga a zirchhuah hnuin, 1968 khan Syracuse University aṭangin law degree a nei leh a, 1970-ah New Castle County Councillor atan thlan a ni. Kum 1972-a US Senate member atana thlan a nih khan senator zinga a naupang parukna a ni. Senate Foreign Relations Committee member hun rei tak niin, chairman pawh a ni tawh bawk.
Senate atan term ruk thlan niin, kum 2008-a Barack Obama hnuaia vice president a nih dawn khan a bang.
Kum 1972, December 18-ah a nupui Neilia leh an fanu kum khat mi Amy chu motor chesualah an thi a, an fapa pahnih Beau leh Hunter-ten hliam na tak an tuar bawk. Biden chuan a fapate enkawl tur hian Senator a nihna aṭanga ban pawh a tum hial a, mahse hetihlaia Senate Majority leader Mike Mansfield chuan bang lo turin a thlem thlu thei hram a ni.
Kum 1977, June 17-a a nupui pahihna Jill Tracy Jacos nen inneiin, an fanu Ashley Blazer chu social worker a ni. Biden-a fa hmasa, Beau Biden chu Army Judge Advocate leh Delaware Attorney General a ni a, kum 2015 khan thluak cancer-in a thi. Hunter Biden chu Washington attorney leh lobbyist a ni.
Donald Trump
Donald John Trump hi kum 1946, June 14-ah piangin, US President 45-na ni lai a ni. Politics a luhchilh hmain businessman leh television personality a ni.
Donald Trump hian University of Pennsylvania-a Wharton School aṭangin economics-ah bachelor degree a nei a, Fordham University-ah kum hnih a kal bawk. Kum 1971 khan a pa real estate business-ah president niin, The Trump Organization tiin a thlak. Kum 2003-2015 khan reality telivision series, The Apprentice a buatsaih bawk.
Politics lama tawnhriat nei loin kum 2016 President thlan dawnah khan Republican candidate a ni a, popular vote-ah a khingpui Democratic presidential candidate Hillary Clinton hneh lo mah se, electoral college vote a hmuh hnem zawk avangin US President atan thlan tlin a ni. US President term khatna chelh tur thlan chhuah zinga upa ber niin, military or government service nei lo thlan chhuah hmasa ber a ni bawk.
Trump hian nupui pathum nei tawhin, fa panga a nei. A nupui pathumna, Melania Trump hi Slovenia mi a ni a, kum 2005-ah inneiin, kum 2006 khan Melania hian US citizenship a nei a ni.
Trump hian business, financial leh political topics chungchangah lehkhabu 19 a ziak tawh a, a lehkhabu ziah hmasa ber, The Art of the Deal (1987) chu New York Times Best Seller list-ah kar 48 chhung zet a awm. Trump chuan he lehkhabu hi Bible dawta a lehkhabu duh ber tiin a sawi ṭhin.