Argentina-ah Covid-19 vanga thi nuai 1 tling tawh

Argentina chu Latin America ram zinga Covid-19 vanga thi nuai khat chuang awmna ram pangana a ni ta. An ramah hian coronavirus leng chu health network leh economy-in nasa takin a tuar mek a ni.

Argentina health ministry chuan Nilaini khan Covid vangin mi 614 an thih belh leh tih sawiin, heng mite nen hian hripui vanga thi hi nuai khat an chuang tawh a ni.

Johns Hopkins University data tarlan danin, Argentina ramah hian hripui len tirh aṭang khan hri kai hmuh chhuah maktaduai 4.7 awm tawhin, hri vanga thi 1,00,250 an tling tawh bawk. Argentina hi Latin America ram zinga hripui tuar na ber zinga mi an ni a, thla hmasa aṭang khan nitina hri kai zat leh ICU-a awm zat tlahniam ṭan mah se ram pum huap erawh chuan an dinhmun a la ṭha lo hle.

Pan American Health Organization (PAHO) hotu Carissa Etienne chuan hri kai chu an pun thar leh thu sawiin, "Kan inthlahdah hian hri kai an pung ṭhin a ni. Kan chau tlang vek tawh a, mahse hri kai tamna hmun ngaiah bawk hmuhchhuah an tam ṭhin a, mipui hriselna dinhmunte ngaihtuahin hri darh mek chhuchat tur hian rang tak leh inthlahdah zui loa hmalak a ngai a ni," a ti.

Argentina sorkar chuan hri leng thawh hnihna thlen hma, kumtir lam khan lockdown a puang nawn tawh a, mahse khuahkhirhna a lo siam tawh zinga a tam zawk chu hlih a ni tawh. Hri laka an him theih nan ramri a lo lut turte chu uluk taka endik ṭhin an ni.

April thlaa Argentina rama hri pui len vanglai khan ICU khum zinga 80% chuang chu hri kai enkawlna atan hman a ni.

Ram mipui maktaduai 20.6 te chuan vaccine dose khatna an la tawh a, chung zinga maktaduai 5.1 chuan dose kimin an la tawh tih thuneitu te chuan an puang. Nimin thleng khan puitling zinga 60% ten vaccine dose khatna an la tawh bawk.

SKorea-ah khuahkhirhna tikhauh
South Korea ramah pawh hri kai an pun thar leh avangin nimin aṭang khan hri laka invenna tura social distancing rules hman mek chu tihkhauh lehzual a ni.

Nilaini khan hri kai thar mi 1,615 an awm a, an ram khawpui Seoul leh a chhehvel bialah Delta variant vangin hri kai hi an pung chak chho leh niin Korea Disease Control and Prevention Agency (KDCA) chuan a sawi. July 4-10 inkara South Korea-a hri kai hmuh thar zinga 30.7% chu Delta variant kai an ni.

Prime minister Kim Boo-kyum chuan nimin aṭang khan ram chhung hmun tam zawkah social distancing dan khauh zawka hman a ni tih sawiin, khuahkhirhna an siam chu level 2 aṭangin level 4-ah san chhoh a ni, a ti. Level 4 khuahkhirhna hnuaiah hian zan dar 6 hnu lamah mi pahnih chin bak awmdun khap a ni. Seoul khawpuia school-te pawh July 25 thleng online-a neih tur tih an ni bawk.