France-ah 'health pass' rules duh loin nawrh huaihawt

France sorkarin Covid-19 hri darh zel tur venna atan 'health pass' rules siam a tum duh loin Nilaini khan an ram khawpui, Paris bakah Nantes, Marseille leh Monpellier-ahte mi tam takin nawrh an huaihawt.

President Emmanuel Macron chuan August thla aṭangin bar, restaurant leh cinema hall-a lut turte tan Covid-19 vaccine certificate emaw, negative PCR test report emaw neih kher turin ruahmanna a siam a ni. Mahse he ruahmanna hi mi tam takin duh loin an sawisel nasa hle.

Health rules siam tum duh lohna lantira pungkhawmte hi police-te chuan tear gas nen an hnawtdarh a, pungkhawmte hian bawlhhlawh bawmte halin buaina an siam zui bawk.

Nawrh huaihawtte chuan President Macron-a ruahmanna siam chu mimal zalenna rahbehna leh, Covid vaccine la duh lote en hranna niin an puh. Democracy kalphung lo leh, a mimal thuneihna lekkawh tumah an puh a ni.

Macron chuan hri laka an himna leh boruak a pangngai leh theihna tur kawng ṭha ber chu vaccine lak ṭhat a ni tih a sawi a, mipuite pawh a tam thei ang bera vaccine la turin a ngen.