Xinjiang bial thil siam lakluh khapna bill US Senate-ah lungrual taka pass a ni

US Senate-ah China-a Xinjiang bial aṭanga thil siam reng reng US-a lakluh khapna tur bill chu Nilaini khan lungrual taka pass a ni. Hei hi China-a Uighur leh Muslim group dangte thliarhran leh beih an nih chungchanga US-in a chhan letna pakhat nia sawi a ni.

Senate-a bill pass tak, Uyghur Forced Labor Prevention Act chuan Xinjiang bial aṭanga thil siam chhuahte chu tihluihna hmanga thawktu chhawrte siamtir nia tarlangin, hei vang hian 1930 Tariff Act hnuaiah bungruate hi an ramah lakluh khap a ni. He dan hmang hian thil siamchhuahna kawnga hnathawktute chu tihluihna hmang chhawr an ni tih finfiahna a awm chuan an bungrua siamte hi US-ah lakluh khapsak theih an ni.

Bill hi Senate-ah pass a nih hnu hian House of Representative-in a pass a ngai ve leh dawn a, House-in a pass ve leh hunah President Joe Biden hnenah thawnin, ani hian 'law' a chantir turin a hming a lo ziah hnan a ngai ang.

Republican senator Marco Rubio chuan bill hi rang taka ngaihtuah turin House a ngen a, Xinjiang biala mihring laka pawikhawihna thleng mek chu an enliam mai tur a ni lo a, sumdawng tumahin heng aṭanga hlawkna an neih hi an remti tur a ni lo, a ti. Mahni mihringpuite tihnawmnahna hmunah hian America sumdawngte chuan hlawka tel an tum tur a ni lo a, America mi tupawhin tihluihna hmanga hnathawka chhawrte thil siam tir chu an leisak tur a ni lo, a ti. Democratic leh Republican member-te chuan House-ah pawh he bill hi a tlang ngei an beisei tih an sawi.