Germany leh Belgium-ah tuilian vangin mi 92 an thi
Germany khawthlang lam leh Belgium ramah ruahsur nasa avangin tui a lian a, tuilian hian kawtthlera motor-te pawh a hnawl nasa hle, in eng emaw zat a len chhen bawk. Tuilianin chhiatna a thlenah ram pahnihah hian mi 92 an thi tawh a ni.
Germany
Germany-a Rhineland-Palatinate leh North Rhine-Westphalia state-te chu tuilian tuar na zual niin, heng state pahnihah hian tuilian vanga thi hi mi 81 an tling tawh a, chin hriat lohin mi tam tak an awm mek bawk. Mi 700 chenna, Schuld khuaa inte chu tuilian hian a ti chhe deuh vek tawh a ni.
US-a cham mek, Germany Chancellor Angela Merkel chuan an rama chhiatna rapthlak tak thleng chu pawi a tih thu sawiin, nunna chan chhungte a tuarpui thu a sawi. Thi zat pawh an la pun chhoh a rinawm thu a sawi bawk.
Chhanchhuah hna thawk tur hian sipai, police leh emergency service worker 15,000 vel tirh an ni a, mahse tuilian hian kawngpuite a danchah avang leh internet service-te a chhiat tel avangin duh angin an thawk chak thei lo tih official-te chuan an sawi. Helicopter hmangin in chunga tangte chu hruai chhuah a ni a, thingkung tlu leh bawlhhlawhin kawngpui a hnawhpinte pawh tank hmangin thenfai mek a ni bawk.
North Rhine-Westfalia parliament chuan an state-a chhiatna nasa tak thleng avangin nimin khan emergency meeting an nei nghal a ni. Germany interior minister Horst Seehofer chuan sorkar laipui chuan tuilian tuarte sum lama chhawmdawlna tur hi a rang thei anga pek a tum tih sawiin, karleh Nilaini khian cabinet-in a pawm hman beisei a nih thu a sawi.
Belgium
Belgium ramah pawh tuilianin chhiatna a thlenah mi 11 an thi tawh bawk. An ram chhim leh khawchhak lamten tuilian hi an tuar a, kawngpuite a chim avangin rel service-te pawh tihtawp lailawk a ni.
Mi nuai hnih chenna, Liege khawpui chu Meuse lui lianin a chim avangin lui hnaiha awmte chu hmun sang lama insaseng turin mayor chuan a hriattir a ni. Lui tui hi a la len belh dawn nia sawi a ni a, official-te chuan dam bridge pawh chhe mai thei dinhmunah a ding mek tih an sawi.
Belgium lal King Philippe leh Queen Mathilde-te chuan nimin khan Liege khaw chhimchhak lam, Chaudfontaine-a tuilian tuarte awmna, crisis centre an tlawh.
Germany leh Belgium bakah Luxembourg leh Netherlands ramte pawhin tuilian hi an tuar a, chenna in eng emaw zat a chhia a ni.