Africa-ah Covid-19 vanga thi 43% in an pung

World Health Organisation (WHO) chuan African khawmualpuia Covid-19 hri vanga thi chu kar khat chhungin 43% in a pung tih a sawi.

Africa khawmualah hian Delta variant a darh mek a, hei vang hian hri kai an pung chakin thihpui pawh an pung nasa hle. Hri kai an pun chak avangin ICU khum leh oxygen indaih lohna a thleng chho mek a ni.

WHO chuan Africa-ah hian July 4-11 chhung khan hripui vanga thi hi mi 6,273 an awm tih sawiin, kar hmasa khan mi 4,384 an thi a ni. "Kar riat chhung chu hri kai hian pun lam an pan tawh a, kar nga liam ta aṭang khan thi zat hi an pung tawh bawk a ni. Africa ram hrang hranga hospital-te an khat chho tawh hle," tiin WHO regional director for Africa Dr Matshidiso Moeti chuan a sawi. Kar liam taa hripui vanga thi zinga 83% hi Namibia, South Africa, Tunisia, Uganda leh Zambia rama mi an ni. Africa khawmualpuia hri kai hmuh chhuah hi maktaduai ruk an tling tawh a, hri kai hi kar khat chhung lekin maktaduai khatin an pung hman a ni. Hetih lai hian he khawmuala cheng, puitling zinga 1.5% vel chauhin vaccine dose kimin an la la a ni.

Delta variant chu khawvel ram hrang hrangah a darh chhoh leh mek avangin nitina hri kai thar pawh an pung chho leh tih sawiin, WHO chuan he variant hlauhawm tak hian khawvel chu a tibuai leh mek a, hri leng hi a la tawp mai dawn lo tih a sawi.