Germany leh Belgium-ah tuilian vanga thi pung zel

Germany khawthlang lam leh Belgium rama tuilian an tawrh mek avanga thi chu an la pun belh zel.

Tuilian hian chenna in tam tak tichhiain, kawngpui leh power line-te pawh an chhe nasa hle. Ram pahniha tuilianin chhiatna a thlen vanga thi mi 170 vel an ni tawh nia sawi a ni a, hetih lai hian chin hriat lohin mi tam tak an awm bawk.

Germany police-te chuan an rama tuilian chu kum 50 chhunga tulian an tawrh nasat ber niin an sawi. Germany president Frank-Walter Steinmeier chuan tuilian vanga mi 45 thihna thlenna, North Rhine-Westphalia state-a Erftstadt chu a tlawh a, thi chhungte a tawrhpui thu a sawi. Chancellor Angela Merkel pawhin nimin khan Rhineland Palatinate state a tlawh bawk. He state chhunga mi, mi 700 vel chenna Sculd khuaa chenna in chu tuilian hian a hnawl chhe vek a ni.

Tuilian tuarte ṭanpui leh chhanchhuah hna thawk tur hian emergency service worker mi sing tel chhawr an ni a, sipai 850 velin an pui bawk. Helicopter, sipai motor leh lawng hmangin harsatna tawkte hi hruai chhuah an ni a, in chim hnuaia tang an awm leh awm lote pawh zawn an ni bawk. Chhanchhuah hna hi ngawrh taka thawh ni mah se, infrastructure chhia a tam avang te, kawngpui chhiat vang leh hmun tam takah phone network a chhiat avangin an tum angin an thawk chak thei lo a ni.

Belgium chhim lam, Luxembourg leh Namur province-a tuilian tuarte ṭanpui leh chhawmdawlna hna pawh thawh mek a ni. Belgium rama tuilian hian kiam lam a pan ṭan a ni. Prime minister Alexander De Croo leh European Commission president Ursula von der Leyen-te chuan Irninni tlai khan tuilenna hmun ṭhenkhatte an tlawh.