Thailand-ah hri kai pung zel vangin lockdown puan belh

Thailand chuan ni thum chhung a zawna hri kai hmuhchhuah tam ni ber an tawn hnuah province pathumah Covid-19 khuahkhirhna a siam belh a, mipuite chu pawn chhuak lo tura hriattirin, zan lamah curfew puan a ni bawk.

Nimina thuchhuah a siamah, sorkar chuan Chonburi, Ayutthaya leh Chachoengsao province-a chengte chu Thawhlehni aṭang chuan pawn chhuah an khap tlat dawn tih a tarlang. Hei bakah hian zan dar 9 aṭanga a tuk zing dar 4 thleng curfew puan a ni bawk a, province pawn lam aṭanga lut tur venna atan checkpoint siam a ni ang.

Bangkok leh province pakuaah chuan kar liam ta Thawhṭanni aṭang khan kum khat chuang hnua khuahkhirhna khauh ber an kalpui mek a ni.

Thailand-ah nimin khan hri kai thar 11,397 awm belhin, mi 101 an thi. Hri kai 4,03,386 awm tawhin, hri kaihhnawih vanga thi 3,341 an awm tawh bawk. Hri kai leh mitthi tam zawkte hi April aṭanga hmuhchhuah, hri inkaichhawn awlsam Alpha leh Delta variant darh vang nia sawi a ni.

Hri vang hian damdawi-in te chu an lun hle a, an ram economy a nghawng mai bakah khualzin hmanga an ram eibar siamṭhat an tumna chu derthawng takin a siam chho leh mek.

Hripui khuahkhirh tuma an beihna kawngah Thailand hian Zirtawpni khan ram pumah mipui punkhawm khapna tichhuakin, thupek zawm lo te chu kum hnih chhung lungin tan emaw Thai baht cheng 40,000 ($1,220) chawi tir emaw, a pahniha hrem theih an ni bawk.

Vaccine supply a chhiat avangin ramchhungah vaccine semchhuah hi a muang hle a ni. Thailand mipui 5% chiahin dose kimin an la la a, health lama thuneitute chuan an ram mipui daih khawp pawh an pek zawh loh avangin, tualchhunga an siam AstraZeneca vaccine te chu bithliah mumal tak siamin a tlem thei ang ber an thawnchhuak tawh dawn tih a sawi.