UK health minister Javid-an COVID-19 kai

Britain health minister Sajid Javid chuan Inrinni liam ta khan Covid-19 hri a kai tih hmuhchhuah a nih thu sawiin, vaccine dose kima a lo lak tawh thu leh, hri kai mah se a taksa lamah harsatna a neih loh thu a sawi.

Kar thum chhung health secretary hna lo chelh tawh Javid hian Delta variant pung chho mek kara prime minister Boris Johnson-a'n vawiin aṭanga ramchhunga coronavirus khuahkhirhna hlip vek tura thutlukna a lo siam tawh chu a thlawp tlat tih a sawi.

Javid chuan rapid lateral flow test hmanga a positive tih an hriat hnuah, PCR test nawn lehin a positive tih chu nemngheh a nih thu a sawi. In lamah inkhunghrangin hna a thawk zawm theih tho dawn tih a sawi bawk.

Javid hian March 17 khan Oxford/AstraZeneca (AZN.L) COVID-19 vaccine dose khatna hi la in, May 16 khan dose hnihna a la a ni.

Vaccine hian hri lakah 100% in veng thei lo mah se vaccine dose la kim tawh te chuan Covid-19 lo kai pawh nise natna an tuar dan chu nasa takin a tiziaawm a ni.

Public Health England-in zirchianna an neihah, AstraZeneca vaccine dose hnih lak hian Delta variant kai pawh, symptomatic disease lakah 60% in a veng thei a, damdawi-in awm theihna 92% in a tlahniam tih an tarlang.

Britain hian Covid-19 hri leng thar hmachhawn thar leh mah se, Johnson leh Javid-te chuan Covid-19 vaccine programme vangin hri kai leh thihpui an tlem phah niin an sawi.

Khawvela Covid-19 vanga thi tam lamah Britain hi pasarihna an ni mek a, an rama cheng puitling hmun thum ṭhena hmun hnih te chuan vaccine dose kimin an la tawh a, naupang erawh chu vaccine hi pekchhuah an la ni ve lo.

Scientist ṭhenkhat chuan sorkarin inthlahdul a tumna chu sawiselin, England-a vaccine la dawng kim lo mi tam tak an awm lai leh, vaccine-in hri lakah 100% in a veng thei lo tih hre reng chunga inthlahdul chhoh chu a hlauhawm thei dawn niin an ngai a ni.