Trump-an Syria mi 6,900 awm chhunzawm phalsak

US President Donald Trump chuan Syria tualchhung indona thleng avanga US-a Syria mi tlan lut, mi 6,900-te chu US-a an awm chhunzawm a phalsak.

US sorkar chuan heng Syria mite hi humanitarin programme, Temporary Protected Status (TPS) hnuaiah an awm chhunzawm phalsakin, he programme hnuaiah hian an rama thawnkir an nihna tur lakah humhalh an ni dawn a ni.

President Trump hian tun hnaiah ram eng emaw zat atan TPS programme hi a lo titawp tawh a, hei hi El Salvador, Haiti leh Nicagarua aṭanga US-a pemlutten an tuar tawh a ni.

Syria raltlan awm chhunzawm phalsakna hian kum 2016, August thla hnu lama lutte erawh a huam lo thung. US-a khawsa mek leh hna thawk, Syria mite tan TPS hi thla 18 in pawhsei sak an ni.

TPS hi kum 1990-a siam niin, he programme hian tualchhung buaina leh chhiatna thlenna ram, mihring tana him lo nia hriat rama chengte US-a an luh a, hna an thawh a phalsak a ni. He programme hmang hian ram 10 aṭanga kal mi tam tak chu US-ah hian an khawsa mek a ni.

Syria-ah hian kum 2011 aṭang khan tualchhung indona chhuakin tun thlengin an la buai a, mi nuai tel chu himna zawngin an tlanchhe tawh a, mi sing tel chu indonaah hian an thi tawh bawk. US-a Syria mi tlanchhe lut, TPS status pekte chu kumin March 31 hian an TPS a tawp tawh dawn a, mahse sorkarin thla 18 atan a pawhsei sak leh ta a ni.

Secretary of Homeland (DHS) Security Kirstjen M Nielsen chuan Syria tualchhung dinhmunin ṭhat lam a pan loh avangin TPS hi pawhsei sak an nih thu a sawi a, ramdangte TPS pek pawh an ram dinhmun nen ngaihtuah ṭhat zel a nih tur thu a sawi.