Maldive court-in Mohamed Nasheed thubuai titawp

Maldive court chuan an ram president hlui Mohamed Nasheed-a laka firfiak zawnga chea puhna thubuai siam chu a titawp a, jail-a tang mek politician eng emaw zat chhuah turin thupek a tichhuak nghal bawk.

Supreme Court-ah hian eptu ṭangrualte chuan an ram Prsident Abdulla Yameen chu dik lo taka rorel, mipuite dikna chanvo palzut sak leh eiruknaa inhnamhnawiha puhin ban tura phutin petition an thehlut a ni. Mahse court chuan an ngenna thehluh hi a pawm sak lo a, mahse jail-a tang mek eptu politician pakua chu dik lo taka an chungthu relsak nia sawiin chhuah turin a ti zawk a ni.

Court chuan nikuma eptu lam an zawm avanga parliament member an nihna hlihsak, mi 12-te chu Parliament member-ah a dah let leh a, hei vang hian eptu lam chuan parliament-ah majoirity an nei thei tawh dawn a ni.

Eptu party lian ber, Maldivian Democratic Party (MDP) chuan court thutlukna siam chu lawmawm an tih thu sawiin, an ram hruaitu inluling tak President Yameen-a tawpna tur a ni, an ti.

Kum 58 mi, Yameen hi kum 2013-a sawisel hlawh taka, president thlan ṭhatna an neihah khan Nasheed hi hnehin Yemen president atan hian lakluh a ni. A rorelna hnuaiah hian politics lama buaina te, tualchhung buainate a thleng fo a, nasa taka eiruah puh a ni bawk.

Kum 2015 khan tualchhung buaina chhuak ṭanin, democracy kalphung anga an ram president atana thlan tlin hmasak ber, Nasheed chu a hun laia judge a mantir avangin firfiaka chea puhin man a ni. Nasheed man anih vang hian mi tam takin lungawi lohna an lantir a, UN pawhin a chungthu relsak a nih dan chu a dem thu a sawi bawk. Nawrh huaihawt vang hian sorkar dodal zawnga chea puhin mi tam tak man an ni. Eptu hruaitu eng emaw zat man an nih bakah, tam tak chu ram pawn lamah an tlanchhe bawk.

Nasheed hi kum 2016 khan damdawi-a in enkawl turin UK a pan a, UK-ah hian inhumhimna dila awmzui a dil nghal a ni.