SAfrica-ah miner 955 chhanchhuak

South Africa-a rangkachak khur, gold mine-ah power tawp vangin hnathawktu 955 zet an tang a, zan hnih an tan hnuah nimin zing khan chhanchhuah an ni.

Nilaini zan khan Welkom khuaa Beatrix mine-ah hian khur chhunga hna thawh laiin power supply a tawp a, hei vang hian hnathawktute hi chhuak thei loin an tang a ni. He mine hi Sibanye-Stillwater mining firm ta a ni a,a khur hi level 23, meter 1,000 vela thuk a ni tawh a ni.

Khur chhunga hnathawk tangte chhanchhuah hna hi thawh nghal ni mah se, generator an hmu mai thei lo a ni. Ningani khan khur chhunga tangte tan hian ei tur leh tui thianghlimte thlaksak a ni a, mahse nimin zing khan power supply awm tawhin miner-te hi khaichhuahna an ni thei ta a ni. Lakchhuah an nih hnu hian an hriselna te pawh endik sak nghal an ni bawk.