England-ah khuahkhirhna zawng zawng hlip vek

Britain sorkar chuan hripui leng vanga khuahkhirhna a lo siam tawh zawng zawng - face mask vuah leh social distancing dan huam tel vekin, Pathianni zan aṭang khan a hlip vek. Hetih lai hian scientist-te chuan he thutlukna hi an thlawp lo a, hri kai an pun mai bakah variant thar insiam leh theihna a sang hle niin an sawi thung.

Pathianni zan aṭang khan puipunna hmuna face mask vuah leh in lam aṭanga hnathawhte hi an titawp a ni. Nightclub-te pawh nikum March thla aṭanga lockdown kalpui anih hnuah a vawi khatna atan a inhawng leh thei ta a ni. Indoor hmun ṭhenkhat, theatre leh cinema hall-te pawh mipui lengzat bithliah awm loin punkhawm phal a ni tawh.

Health minister Sajid Javid-a'n Covid-19 a kai avanga inkhunghrang mek prime minister Boris Johnson chuan mipuite chu fimkhur turin a chah. Khuahkhirhna hlih a nih chungchanga zawhna leh hlauhthawnna awmte pawh chhangin PM chuan, "Uluk takin mahni ṭheuh inzawt ila, tuna kan tih loh chuan engtikah tak nge kan tih chuan ang? Tun hi hun ṭha ber chu a ni, mahse fimkhur taka kan awm ṭheuh a ngai. He hri hi a la awm reng tih kan hriatreng a la ngai a ni," tiin Johnson chuan Pathianni khan a sawi.

Zirtawpni liam ta khan khawvela scientist ṭha rualte chuan ṭhenkhat in England-a zalenna ni, "Freedom Day" tiha an sawi hi khawvel tan a pawi thei nia sawiin, he thutlukna avang hian Boris Johnson-a kaihhruai Conservative sorkar an dem thupawh British medical journal, The Lancet-ah an tarlang a ni. "He ruahmanna avanga rahṭha rawn chhuak tur hi ka hrethiam pha ve lo, ka hlauthawng a ni. Nghawng ṭha lo tak a nei dawn a ni," tiin University of Leicester-a clinical virologist, Julian Tang chuan a sawi a ni.