Prophet Muhammad cartoon ziaktu Kurt Westergaard a thi

Prophet Muhammad cartoon a ziah avanga khawvel hmun hrang hrangah Muslim lungawi lohna thlen phahna, Danish artist Kurt Westergaard chu hun rei tak a dam loh hnuah kum 86 mi niin Pathianni khan a thi.

Kum 2005-a Denmark chanchinbu, Jyllands-Posten-a Kurt Westergaard-a ziah, Prophet Muhammad cartoon tihchhuah a nih khan Muslim-te a tithinur hle a, Denmark ram chhungah lungawi lohnate an lantir a, a hnuah ram pawn lamah lungawi lohna hi darhin, ram danga Denmar embassy-ten beih an tawh phah a, buaina chhuakah mi eng emaw zat an thih phah bawk. He cartoon-ah hian Prophet Muhammad chu turban bomb a khumtir a ni.

Westergaard pawh hian thaha vauna leh thah tuma beihna pawh a tawk hial bawk. Hun eng emaw chen chu a biru hman a, mahse a hnuah Aarhus, Denmark-ah a cheng zui a ni. Mahse a hnu lamah bodyguard nen, a chenna hmun puangzar loin a khawsa zui leh a ni. Westergaard chuan a cartoon ziah avang hian inchhirna a neih loh thu a sawi.