NKorea ṭhalaite SKorea mite ṭawngkam entawn lo turin ti

North Korea media-te chuan an ram ṭhalaite chu South Korea ṭawng ler(slang) hmang leh entawn lo tur leh an ram ṭawng ziding (traditional language) chiah hmang tawh turin an ti.

North Korea official newspaper chuan South Korea mite te anga inchei lo turin ṭhalaite hi an hrilh bakah, South Korea zaithiam-te rimawi (music) ngaithla tawh lo tur leh an hairstyle-te pawh entawn lo turin a ti a ni.

Rorellai, Worker's Party of Korea-a Central Committee official newspaper, Rodong Sinmun chuan North Korea mite chu South Korea pop culture hmanga inthunun tir lo turin a ngen a, "Rilru sukthlek leh hnam zia tidanglam thei turin mi khawsa thei/mi lar te chu hmanruaah an hmang a, silaia min beitu te aiin an hlauhawm zawk a ni," a ti.

North Korea ṭawng hi Pyongyang dialect behchhana siam a ni. An ram ṭhalai leh naupangte chu South Korea-a ṭawngkam ler an hman ṭhinte hmang ve lo tur leh, ramdang ṭawng hrim hrim hmang lo turin an ti bawk.

South Korea-a slang an hman uar zingah hmeichhiaten an pasalte kohna atan 'oppa' tih hi an hmang uar hle a, hei ṭawngkam hi 'nuṭa upa zawkte' sawina ni mah se, SKorea lam hian ngaihzawngte kohna atan an hmang tel a ni. Hetianga ṭawngkam dik loa hman hi NKorea lam chuan entawn lo turin a ti a ni.