Myanmar-ah hri kai an pung chak Chak zawka vaccine pek chhuah tum

Myanmar sipai sorkara health ministry chuan an rama coronavirus vanga thi an tam ber ni an tawn hnuah, nimin khan an ram mipui zahve te hnenah kumin chhungin Covid-19 vaccine pekchhuah hman an tum tih a sawi.

Tun hnaiah Myanmar ramah hian hri kai an pung chak hle a, February 1-a Aung San Suu Kyi kaihhruai civil sorkar paihthlaa sipai rorelna a din avanga mipuiten lungawi lohna lantir a, tualchhung buaina a thlen chhoh reng avangin hri darh tur venna kawnga hmalakna pawh a bahhlah phah hle a ni.

Sorkar chanchinbu Global New Light of Myanmar tarlan danin, ram mipui maktaduai 56 zingah mi maktaduai 1.6 chiahin vaccine hi an la la a, hemi rual hian "Ram mipui 100% in vaccine an dawn theihna turin ramdang aṭangin an lalut reng a ni," a ti.

Ningani hian China siam vaccine dose 7,50,000 a thleng dawn a, ni hnih hnuah a dang pawh a thlen belh leh dawn nia tarlan a ni. Hei bakah hian Russia pawhin a vaccine siam chu dose maktaduai hnih tun thla chhung hian Myanmar-ah a thawn dawn tih sipai hotute chuan an sawi bawk.

United Nations chuan Covid­-­19 darh mek do nan COVAX programme kaltlangin ram mipui 20% daih khawp tur vaccine hi Myanmar hnenah an pe dawn tih Thawhṭanni khan a sawi.

Myanmar-ah Thawhṭanni khan Covid-19 vangin mi 281 an thi a, hri kai thar 5,189 an awm. Health ministry-in a chhinchhiah danin an rama hri kai hmuh chhuah tawh hi mi 2,34,710 an tling tawh a, hri vanga thi 5,281 an awm tawh bawk. Hetih lai hian damdawi-in lama thawk leh mitthi vuina hmuna thawktu te chuan sipai sorkarin mitthi zat an puan ai hian thi an tam zawk nia sawiin, mitthi dahna hmun te chu a khat vek tawh niin an sawi thung.

Sipai rorelna dodaltuten civil sorkar aiawha an din, National Unity Government (NUG)-a health minister, Zaw Wai Soe chuan an rama hri darh mek chungchangah rang taka hma lak a nih loh chuan mi 4,00,000 thlengin nunna an chan thei tih a sawi. Hri vanga nunna chan tam takte chu sipai sorkarin private oxygen supplier-te khuahkhirhna a siam vang niin sipai rorelna eptute chuan an sawi.

Khawvel pumah hri kai mtd 190.8 awm tawh
John Hopkins University data-a a lan danin, nimin zing thleng khan khawvel pumah Covid-19 hri kai hmuh chhuah maktaduai 190.8 an awm tawh a, hripui vanga thi mi maktaduai 4.09 chuang an awm tawh bawk.

US chu hri kai leh thihpui tam ber ram a la ni chhunzawm zel a, hri kai hi 3,41,29,516 awmin an zinga 6,09,233 in an thihpui tawh a ni. Hri kai tam lamah India chu pahnihna niin, hripui vanga thi erawh India ram aiin Brazil ramah an tam zawk thung. Brazil-ah hian hri kai 1,93,91,845 awmin mi 5,42,756 chu Covid-19 hri vangin an thi tawh a ni. Hripui vanga mi maktaduai chuang thi awmna ramte chu US leh Brazil bakah India, Mexico, Peru, Russia, UK, Italy, Colombia, France leh Argentina ramte a ni.