Iraq khawpui-a bomb puakah mi 28 an thi

Iraq khawpui Baghdad khawchhak lama bazar lun laiah Thawhṭanni khan bomb a puak a, mi 28 an thi a, mi 66-in hliam an tuar tih Iraq Interior Ministry chuan a sawi.

Bomb puahna hmun hi Sadr City-a bazar lar tak a ni a, a bul hnaia dawr leh inte chu a chhe nasa hle.

Prime minister Mustafa al-Kadhimi chuan emergency meeting ko nghalin, security leh intelligence commander-te chu he pawikhawihna thleng chungchang hi an sawiho nghal a ni. Meeting-ah hian PM al-Kadhimi chuan he inbeihna thleng vanga thi chhungte hnenah pawikhawihtu, firfiakte chu man an nih ngei theihna atan ram pum huapa chhui pawh ngai se an chhui chhuak ngei dawn tih a tiam.

Iraq President Barham Salih chuan Muslim hun pawimawh, Eid al-Adha hma nia pawikhawihna thleng chu "sualna tawpkhawk leh nunrawn thlak tak" tiin "Dawihzep taka firfiakte chetna thleng ṭhinte hi kan tihtawp hma loh chuan kan chawl lo ang, " tiin a sawi.

Thuneitute chuan thil thleng chu a chhuichian hunah thu chiang zawk an tihchhuah thuai tur thu an sawi a, nimin thleng khan pawikhawihna thlentu nia inchhal an la awm lo a ni.

Baghdad-ah bomb hmanga inbeihna hi a thleng khat tawh hle a, kum 2017-a Iraq sipaiten IS firfiakte an hneh hnu kha chuan venhimna lamah pawh harsatna an tawk khat tawh hle.