Afghanistan President chenna in bul rocket-in kap

Afghanistan khawpui, Kabul-a president Ashraf Ghani chenna in bul chu nimin zing khan Muslim festival, Eid al-Adha puala ṭawngṭaina hun an hman laiin rocket-in kah a ni.

Official-te chuan rocket hmanga kahnaah hian hliam an awm lo niin an sawi a, pawikhawihtute hi tute nge tih hriatchian a la ni lo bawk.

President Ghani hoa ṭawngṭaina hun an hman lai hi TV-ah tihchhuah a ni a, rocket puak rite hi hriat ni mah se President hian ṭawngtaina hi a neih chhunzawm reng tho a ni.

Rocket an kahna, Green Zone hi Presidential palace bakah ram hrang hrang embassy-te awmna hmun a ni. Nikum khan presidential palace hi rocket hmangin ṭum eng emaw zat kah a lo ni tawh bawk. Interior ministry thupuangtu Mirwais Stanekzai chuan, rocket-te hi nimin zing dar 8 vela kah an ni tih a sawi a, pawikhawihtute hi chhui chian mek an ni, a ti.