Firfiakten Pakistan army camp bei

Pakistan-a Khyber Pakhtunkhwa province-a Swat district-a Pakistan army camp chu kar kalta Inrinni khan firfiakten beiin bomb an tipuak a, sipai 11 an thi a, midang 13 in hliam an tuar bawk.

Inter-Services Public Relations chuan firfiakten an beih hi camp chhunga sports area a nih thu a sawi. Hliam tuar zinga ṭhenkhat chu an dinhmun a ṭhat loh avanign thi zat pawh hi a la pun chhoh a rin thu health official-te chuan an sawi.

Sipaiten volleyball an khelh laiin bomb hi tihpuah a ni a, hliam tuarte hi Kabal hospital panpui nghal an ni.

Firfiak pawl, Tehreek-e-Taliban chuan army camp beitu an nih thu an sawi.

Prime Minister Shahid Khaqan Abbasi chuan pawi­khawihna thleng chu a dem thu a sawi a, mi dawihzep te thiltih avangin Pakistan-in an rama firfiaka chetna umbo tuma a hmalakna chu a tim phah dawn lo tih a sawi. Firfiakte nuaibo an nih vek hma chuan an bei zel dawn tih a sawi.

Swat Valley hi Pakistan Taliban firfiakte chakna leh chet hluarna hmun a ni ṭhin a, kum 2009 khan Pakistan sipaite chuan he hmunah hian firfiakte lakah beihpui an lo thlak tawh a ni. Afghanistan ramri bula awm niin, sipaiten beihpui an thlak­naah hian Taliban firfiak 2,000 chuang zet chu umchhuah an ni.