S.Sudan-in US-a a palai a ko haw
South Sudan chuan US-a a ambassador dah a ko haw. Hei hi US sorkarin in South Sudan-a ralthuam phurh luh khapna thupek a siam vang a ni.
Kar kalta Zirtawpni khan US President Donald Trump-a kaihhruai sorkar chuan South Sudan rama ralthuam phurhluh khapna thupek hi a siam a, UN Security Council hnenah pawh South Sudan-in ralthuam a lakluh khapna hi siam turin a nawr nghal bawk.
US chuan African Union (AU) leh East African regional bloc, Intergovernmental Authority on Development (IGAD) hnenah remna leh muanna a awm theina tura hmalakna ngai pawimawh lo te lakah hrekna siam zel turin a ti a ni.
South Sudan president thupuangtu, Ateny Wek Ateny chuan US-in thupek a tihchhuah hnu hian an ram ambassador, Garang Diing Akuong chu koh haw a nih thu a sawi. South Sudan ambassador hi kum 2015, May thla khan US-ah hian dah a ni.
South Sudan-ah hian kum li chhung zet tualchhung buaina a thleng tawh a, a ram mipuite pawhin an tuar nasa a, ram danga himna zawng tlanchhia pawh an pung chak hle.