Maldive sipaiten Parliament an khar, eptu MP pahnih man

Maldiver rama tualchhung politics buaina chuan zual lam a la pan zel a, Pathianni khan security force-te chuan parliament chu kharin, eptu MP pahnihte an man bawk.

Kar kalta khan Maldive Supreme Court chuan eptu politician, jail-a tang mekte chhuahna tur thupek a tichhuak a, mahse court thupek hi President Abdulla Yameen-a kaihhruai sorkar chuan a zawm duh lo a ni.

Supreme Court hian eptu politican jail tangte chhuahna tur thupek a siam bakah, an ram president hlui Mohamed Nasheed-a lakah thubuai siam pawh a titawp a, eptu MP 12 bante pawh Parliament member-ah a dah let leh bawk a ni.

Mahse President Abdulla Yameen chuan court thupek hi a zawm duh loh avangin tualchhung buaina an tawk chho a ni. Maldive sorkar chuan Parliament session neih tur pawh a sawn hla bawk a, mahse Pathianni khan eptu member-te chuan Parliament compound-ah kal luih an tum a, hei vang hian an zinga pahnih chu man an ni.

Eptu member-te chuan sorkar thlawptu leh court thupek sawiseltu, attorney general leh chief prosecutor-te chu ban phutin petition an thehlut. Eptu pawl hruaitu Ibrahim Mohamed Solih chuan attorney general leh chief prosecutor-te chu Supreme Cour thupek an zawm duh loh avangin dan bawhchhiaah a puh.

UN Secretary General Antonio Guterres bakah US sorkar pawhin Maldive sorkar chu Supreme Cour thupek zawm tur hian an lo ngen tawh a ni.