Kim Yong-nam-an NKorea team a ho dawn

South Korea Unification Ministry chuan tunkar Zirtawpni aṭanga ṭan tur, Winter Olympics-ah North Korea team member 22-te chu NKorea ceremonial head of state Kim Yong-nam-an a ho dawn tih a sawi. Korea ram pahnihte hian inremna an lo siam tawh angin, Winter Olympics opening ceremony-ah ram pahnih aiawha infiammite chu flag pakhat, Korean Peninsula flag hnuaiah an kal ho dawn a ni.

North Korea hian infiammi leh official-te bakah art troupe pawh tirh a tum bawk. NKorea chuan an ram aiawha a tirh turte chu NKorea leh Russia inkara kal ṭhin lawng lian hmangin SKorea-ah hian thawn a tum. Mahse kum 2010 aṭang khan NKorea lawngliante chu SKorea an luh khap vek a ni a, hei vang hian hrekna an siam tawh hian Olympics-a tel tur phurtu lawng huam tir lo tura siam dan tur an ngaihtuah mek niin SKorea ministry thupuangtu Baik Tae-hyun chuan a sawi.

Winter Olympics-a hian Korea ram pahnihte hi women ice hockey team-ah an ṭangho dawn a, Pathianni khan joint team hian Sweden nen friendly match neiin 1-3 in an chak lo a ni. NKorea team hotu tur, Kim Yong-nam hi parliament hotu niin, kum li chhunga SKorea tlawhtu tur zinga official level sang ber a ni. Kim hian official dang pathum bakah staff 18 a hruai tel dawn a ni. Winter Olympics hi South Korea khawchhak lam, Pyeonchang khuaah February 9 aṭang hian neih a ni dawn a, opening ceremony-ah hian US Vice President Mike Pence pawh a tel dawn a ni.