Israel-in African refugee-te thawn hawna thupek siam

Israel chuan an rama Africa ram pahnih, Eritrea leh Sudan ram aṭanga lutte thawn haw na tur thupek a tichhuak.

Pathianni khan Israel rama African refugee, chhungte nei loa awmte hnenah hriattrina hi pekchhuah ṭan a ni. Israel rama Eritrea leh Sudan ram aṭanga pem lut, detention centre-a khawsa mek mi 20,000-te chu ni 60 chhunga thawn haw hman vek tum a ni.

Haaretz chanchinbu chuan refugee-te hi Rwanda rama thawn nge an duh, anmahni ramah thawn kir tih zawh an ni dawn tih a sawi. Nikum December thla khan Israel parliament chuan an rama refugee-te thawnkir tura sorkar hnena thuneihna pekna tur bill chu a lo pass tawh a ni.

Sorkar official-te chuan detention centre hrang hrangte tlawhin, refugee-te hnenah Israel sorkarin ram danga an kal theihna tura inremna a siam thu an hrilh a, heng hmunah hian hna thawh pawh phalsak an ni dawn niin an sawi. He lehkhaa ramdang, refugee-te lo lakluh remtituah hian Rwanda ram ziah lan a ni a, a hmain Uganda ram tarlan a ni tawh bawk. Mahse Rwanda leh Uganda chuan African refugee-te Israel ram aṭanga lalut tur hian inremna an ziahpui lo niin an sawi thung. Israel ramah hian himna zawnga tlanlut mi 40,000 vel an awm mek a, an zinga mi 27,500 chu Eritrea aṭanga kal niin, Sudan aṭangin mi 7,800 an lut bawk. Kum 2013 June leh 2017 June inkar khan Israel voluntary departure programme hnuaiah Sudan leh Eritrea aṭanga lut mi 4,000-te chu Rwanda leh Uganda ramah hian thawn an ni tawh a ni.