Maldive President-in emergency a puang Chief Justice leh President hlui a man tir

Maldive tualchhung politics buaina chuan zual lam a pan zel a, President Abdulla Yameen chuan Thawhṭanni zan khan ni 15 chhung atan state of emergency a puang a, hemi hnu nimin zing khan Chief Justice Abdulla Saeed leh Supreme Court judge Ali Hameed-te chu man an ni bawk.

Maldive Supreme Court-in an ram eptu hruaitu, jail-a tangte chhuahna thupek a siam chu President Yameen-a kaihhruai sorkar hian a zawm duh loh vangin court leh sorkar hi an inep zui a ni. Hei bakah hian court hian eptu MP 12 ban tawhte chu an dinhmun ngaiah a dah let leh a, hei vang han eptu lam hian Parliament-ah majority an neih theih dawn avangin sorkar chuan Parliament session neih hun tur pawh tiamchin awm loin a sawn hla tawh bawk.

President Yameen chuan Supreme Court-in eptu pawl hruaitu pakua, firfiak zawnga chea puha mante chhuah zalenna tur thupek a siam chu dan kalh niin a sawi. Security force-te chu Supreme Court building luhchilh tura a hrilh bakah, eptu lam thlawptu Presient hlui Maumoon Abdul Gayoom man turin a ti a ni. Nimin zing khan chief justice leh judge pakhat chu man an ni ve leh bawk a, mahse man an nih hnua thubuai siamsak dan tur erawh sawichian a la ni lo.

Emergency dante TV-ah sawichhuakin, Legal Affairs Minister Azima Shakoor chuan February 1-a Supreme Court thupek tihchhuah chuan an ram inrelbawl dan a tibuai a, ram himna leh mipuite hmakhaw ngaia rorelnaa inrawlh buaina a ni, a ti. Sorkar chuan Supreme Court-in politics vanga tangte chhuahna tur thupek a siam chu a taka kalpui chi nia a ngaih loh thu a sawi bawk.

Emergency dan hnuaiah hian sipaite chu thuneihna sang zawk pek an ni a, ram tana hnawksak thei nia ngaihte thubuai siamsak kher loa man theihna te pek an ni. Judiciary thuneihna pawh dansak niin, Supreme Court judget-te theih loha humhalhna dan pawh ṭhiah a ni bawk.

President Yameen-an Thawhṭanni zana emergency a puan hnuin sipaite chuan Supreme Court building panin an kalh nghal. Hetih lai hian bulding chhungah hian judge-te an awm nia sawi a ni a, ei tur pawh nei loin hren an ni tih Maldives Bar Association president Husnu Al Suood chuan a sawi. Sipai leh police-te chuan court panna kawngte chu dangin mipui kal theih loh turin an veng zui nghal a ni.

United Nations, European Union bakah ramdang sorkar hrang hrang–India, US leh UK-te pawhin Yameen hi Supreme Court thupek zawm tur hian an lo ngen tawh a ni. State of emergency puan a nih hnuah, US chuan Maldive sorkar leh sipaite chu dan zawm a, mipuite zalenna leh democracy kalphungte zah turin a ngen a, khawvelin sorkar chet dan chu a thlir reng a ni, a ti.