Trump-an military parade buatsaih turin Pentagon hrilh

US President Donald Trump chuan an ram khawpui, Washington DC-ah military parade pui tham tak buatsaih turin Pentagon a hrilh.

President Trump hian nikum French Bastille Day parade a hmanpui khan a rilru a hneh hle a, hei vang hian January thla tawp khan sipai hotute hnenah he ngenna hi a siam nia sawi a ni.

Washington DC-ah chuan military parade hi chu indonaa hnehna lawmna pual chauhin neih ṭhin a ni.

Hetihlai hian Democrats lam chuan military parade neih rawtna hi an sawisel a, mi pakhat rorelna rama an tih ṭhin dan nen an tehkhin.

President Trump-a rawtna siam hi Washington Post chuan a tichhuak hmasa a, hemi hnu hian White House press secretary Sarah Sanders chuan a rawn nemnghet a ni. Sanders-i chuan President Trump chuan America ram leh a mipuite himna tura sipaite inpekna chu a ngaisangin a thlawp hle a ni, a ti. Hei vang hian America mipuiten sipaite an ngaihsanzia an lantir theihna tura a lawmna ropui tak buatsaih dan ngaihtuah turin a ti a ni, a ti.

Trump chuan nikum July thlaa French Bastille Day parade a hmanpui khan nuam a tih thu leh, parade a hmuh tawh zinga ropui ber zinga mi a nih thu a sawi a, hemi rual hian he parade aia ropui zawk buatsaih an tum tur thu pawh a sawi a ni.

Democratic politician-te chuan President rawtna siam hi sawiselin, sum tam tak senralna mai mai tur niin an sawi. Representative Jim McGovern chuan Trump chu president ni loa dictator ang maia a chet zawk thu a sawi a, America mipuite chuan an ram hruaitu atan Trump aia ṭha neih chu an phu a ni, a ti. House Armed Services Committe member, representative Jackie Speier pawhin Napoleon ang mai tura a awm chhoh mek thu a sawi a, sum tam tak senralna a nih bakah, hetianga midangte hmuh tura inphochhuah vel chu an ram tihdan phung a ni ve lo niin a sawi bawk.

Military parade hi US leh khawthlang ram dangahte neih a ni ngai lo hle a, North Korea leh mimal thuneihna ramten an buatsaih fo thung. Washington DC-a military parade neih hnuhnung ber chu kum 1991, June thlaah khan niin, hetihlaia president George Bush Snr. chuan Gulf War tawpna leh hnehna an chan lawmna atan a buatsaih a ni.

Lt Gen Mark Hretling chuan sipai hotuten ti tur an ti a nih chuan military parade chu an nei mai dawn tih a sawi a, mahse hei hi sipaite tan thil ṭha tak nia a ngaih loh thu a sawi.