Maldive Supreme Court-in a thupek sut leh

Maldive Supreme Court chuan eptu pawl hruaitu pakua-te jail aṭanga chhuahna tur thupek a siam chu Thawhlehni zan khan a sut leh.

Kar kalta Ningani khan Supreme Court chuan eptu hruaitu pakua-te chhuahna thupek a siam bakah, an ram president hlui Mohamad Nasheed-a laka thubuai siamsak chu a titawp a ni.

Mahse President Abdulla Yameen chuan Supreme Court thupek hi a zawm duh lo a, Thawhṭanni zan khan ni 15 chhung atan state of emergency a puang a, Supreme Court building hi kharsakin chief justice Abdulla Saeed leh judge Ali Hameed leh president hlui Moumoon Abdul Gayoom-te chu man an ni. President Yameen chuan kar hmasa court thutlukna siamnaah hian chief justice chu sorkar paihthlak a nih theih nan tham a ni tih a sawi a, president hlui Gayoom pawh sorkar paihthlak tumah puh a ni bawk.

Thawhlehni zan khan Supreme Court judge dang pathumte chuan eptu hruaitu pakua chhuahna tur thupek tihchhuah chungchang chu ngaihtuah ṭha lehin, court-in thupek a lo siam tawh chu an sut leh a ni. Thuchhuah siamin, judge-te chuan President-in thil awmdan a sawichian hnuah thupek hi siam thar leh a nih thu an sawi.