Central China-ah kum 1,000 hnua ruahsur nasat ber ṭum thleng

China ram laili lai, Henan province-ah nimin khan ruah nasa taka sur chhunzawm lehin, province khawpui Zhengzhou-ah chuan kum 1,000 hnua ruah sur nasat ber ṭum a thleng.

Zhengzhou khawpui kianga Yellow River lian chuan rel kawngte chimin, tuilian vang hian mi 12 an thi a, mi 500 chuang chu chhanchhuah an ni bawk tih thuneitute chuan an sawi a ni.

Zhengzhou-ah kar liamta Inrinni aṭanga Thawhlehni tlai thleng khan ruahtui millimetre(mm) 617.1 a tla tawh a, hei hi he khawpuiin kum khat chhunga ruahtui a dawn ṭhin, 640.8 mm chu a phak ṭep tawh a ni. Ni thum chhunga Zhengzhou-a ruahtui tla hi, 'kum 1,000 hnua a thlen vawi khatna" niin khawchin zir mite chuan an sawi.

Henan province-a cheng mipui maktaduai chuangte nunphung chu ruahsur nasa avanga Yellow River tui lian chuan a tibuai hle. Rel service tihtawp a ni a, kawngpui tam tak khar a nih bakah flight pawh tikhawtlai leh cancel-te a ni bawk. Kawngpui tamtak te chu tui hian a chim pil zo tawh a, reservoir leh dam-te chu hlauhawm chin,warning level an thleng tawh a ni. Tualchhung thuneitu te chuan ruahtui vang hian Zhengzhou chhaklam Luoyang city-a Yihetan dam-ah metre 20-a sang indaidanna an siam chu chim mai thei reng dinhmunah a ding tawh niin an sawi a ni.

Zhengzhou-a local flood control headquarters chuan khawpui chhunga Guojiazui reservoir chu a chhe tawh nia sawiin, Zhengzhou-a cheng mi 1,00,000 te chu hmun him lamah sawn chhuah an ni tawh.

Ruahsur nasa leh tuilian avangin transportation system te hman theih a ni lo a, school leh hospital-te pawh kalpawh theih loin an awm. Naupang ṭhenkhat chu Thawhlehni aṭang khan an zir inah an la tangkhang a ni.

Zhengzhou-a Affiliated Hospital hmasa ber - damlo enkawlna khum 7,000 chuang awmnaah chuan power supply an nei tawh lo a, an backup supply pawh hman theih a ni tawh lo bawk. He damdawi-ina enkawl mek, dam lo ngaihtuahawm zual 600 vel chu hmun danga sawn dan tur ngaihtuah mek a ni. Khawchin zir mite chuan ni thum chhung chu ruah hi a la sur chhunzawm dawn niin an sawi.

Henan province hi China rama wheat siam thar chhuah tamna ber zinga mi niin, food supplier lian pahnihna a ni a, frozen food siamna hmunpui a ni bawk. Khawl siamna hmun pawimawh tak a ni a, iPhone-making plant lian ber awmna a ni bawk.