Tunisia ramah hri leng hluar thar leh Prime Minister-in HealthMminister a ban

Tunisia prime minister Hichem Mechichi chuan an rama coronavirus hri leng hluar thar leh karah health minister Faouzi Mehdi a ban.

Health ministry chuan hripui leng vangin tunhnai an ram health system te chu an tluchhe mek niin a lo sawi tawh. Tunisia ramah mi maktaduai 12 zinga 17,000 chuang chu hri kaihhnawih vangin an thi tawh.

PM office chuan Thawhlehni khan Health Minister ban a nih thu a puang a, mahse ban a nihna chhan tak erawh a sawilang lo. Mehdi ban a nih rual hian health ministry enkawl lailawk tur hian social affairs minister Mohamed Trabelsi chu ruat nghal a ni.

Mehdi hian Tunisia mi, kum 18 chunglamte tan vaccine sem lailawkna tur,temporary vaccination station chu Thawhlehni leh Nilaini khan a buatsaiha, vaccine lam tum an tam avangin mipui pungkhawmte chu a innekbuai phah hial a ni. Hei vang hian ministry chuan kum 40 chunglam tan chauh vaccine hi a pe chhuak leh ta a ni.

Health ministry thupuangtu Nissaf Ben Alya chuan July 8 khan an rama hriselna dinhmun chu a chhe takzet tih sawiin, an health system chu vanduaithlak takin a tlachhe mek tih a sawi. Thawktu indaih loh vangin Covid-19 vanga thi ruang te chu damlo enkawllai te kiangah darkar 24 chuangte buaipuitu awm loh vangin dah te an ngai hial.

Health ministry in Facebook page-ah thla liamtaa special field hospital an din te chuan an daih zo tawh lo niin an tarlang. June 20 aṭang khan khawpui chhungah partial lockdown leh region parukah total lockdown an puang a ni.