Haiti Prime Minister thar atan Ariel Henry lalut

Haiti prime minister thar atan Ariel Henry chu Thawhlehni khan rinawmna thu tiam tira lakluh a ni.

July 7 zing khan president Jovenel Moise chu a chenna inah kahhlum a ni a, hei vang hian ram chhung boruak pawh a la ṭha lo hle. Moise hian a thih hmain Henry hi PM atan hian a ruat hman a ni.

PM atana lakluh a nih hnuah Henry chuan an rama dan leh thupek dinhmun siamṭhat a, boruak ṭha a awm theihna atana hma lak chu a ngaih pawihmawh hmasak tur a nih thu a sawi. Hei hi President thi ta pawhin ti tura a duh a ni tih a sawi.

Haiti khawpui, Port-au-Prince a PM thar lakluh inkhawmah hian President thi ta, Mosie sunna hun hman hmasak a ni. Moise thattute hi man an la ni lo a, US Federal Bureau of Investigation puihnain Haiti sorkar chuan a chhui mek a, mi 20 chuang man an ni tawh.

Kum 71 mi, Haiti Prime Minister thar hi neurosurgeon a ni. Centre-left leh social-democratic party, Inite party member a ni a, kum 2015 khan minister of interior and territorial communities niin, kum 2016 minister of social affairs and labor a ni. Kumin July 5 khan President thi ta, Moise chuan an ram prime minister thar atan a ruat a, mahse ni hnih hnu lekah Moise hi kahhlum a nih tak avangin PM thar lakluh hun pawh hi tihkhawtlai a ni. July 19 khan prime minister ni lai, Claude Joseph chu bangin, a tukah Henry hi lakluh a ni ta a ni.