NKorea-in military parade buatsaih

North Korea chuan Winter Olympics ṭan hma niin military parade a buatsaih niin South Korea media-te chuan an tarlang.

NKorea hian kumtin military parade hi a buatsaih ṭhin a, mahse April thlaa neih a ni ṭhin. US-in a sawisel ṭhin chhan letna atan NKorea hian kumin hian ṭum dang aia hmain a buatsaih ta nia sawi a ni. NKorea hian Winter Olympics neih laiin an palaite chuan US official-te meeting neihpui an tum lo tih a lo sawi tawh bawk.

South Korea Yonhap news agency chuan military parade hi nimin chawhma dar 10.30 aṭang khan neih ṭan a ni tih a sawi.

South Korea sorkar official-te chuan thla hmasa khan Pyongyang aiport bulah sipai 13,000 vel leh an hmanrua chi hrang hrangte hmuh an nih thu an lo sawi tawh a, hei hi militar parade neih tura atana an lo enchhinna nia rin a ni.

Winter Olympics hi vawiin aṭangin South Korea-a Pyeongchang-ah ṭan a ni dawn a, Korea ram pahnihten inremna an lo siam tawh angin opening ceremony-ah ram pahnih aṭanga infiammi telte chu flag pakhat, Korean Peninsula flag hnuaiah an kal ho dawn a ni. Olympics-ah hian NKorea hian infiammi ṭhenkhat a tirh bakah official-te pawh a tir dawn a, NKorea Korea hotu lu ber Kim Jong-un-a farnu, Kim Yo-jong pawhin opening ceremony hi a telpui dawn a ni.