Bangladesh PM hlui Khaleda Zia-i kum 5 tang dawn

Bangladesh Prime Minister vawi hnih lai lo ni tawh leh Bangladesh Nationalist Party (BNP) hotu ni bawk Khaleda Zia chu eiruk thubuaiah thiam loh chantir niin kum nga tang tura a chungthu relsak a ni.

Bangladesh court chuan Zia-i hi fahrahte chan ai pawisa eirua puh a nihnaah chuan thiam loh a chantir a, hei vang hian amah ṭantute leh police-te chu court kawtah hian nasa takin an innek buai nghe nghe.

Kum 72 mi, Zia-i chuan fahrah te chan tur pawisa eiru a puhna hi politics inchirh thehna mai mai a nih thu vawi tam tak sawi tawh mah se Ningani khan court chuan thiam loh a chantir ta a ni.

BNP hotunu hian court thutlukna hi a appeal rin a ni a, mahse hei hian December-a inthlan neih huna a dinhmun tur a nghawng ngei rin a ni. BNP secretary general Fakhrul Islam Alamgir chuan court chu thutlukna dik lo siamah puhin an pawm dawn loh thu a sawi.

Zia-i ukil, Khandkar Mahbub Hossain pawhin politics hmanga phuba lakna a nih thu sawiin court sang zawkah an kal leh dawn thu a sawi ve bawk.

Court thutlukna avang hian Bangladesh eptu pawl-te leh police-te chu court bulah hian an innek buai nasa hle a, police-te hian mipuite hnawh darh nan hian tear gas an hmang hial a, mi eng emaw zatin hliam an tuar bawk a ni.