Germany party-ten ṭangrual sorkar siam remti

Germany party–Christian Democratic Union (CDU), Christian Social Union (CSU) leh German Social Democrats (SPD)-te chuan ṭangrual sorkar siam turin Nilaini khan inremna an siam thei ta.

Nikum September thla inthlanpui neih hnuah party mala sorkarna siam thei an awm loh avangin party hrang hrangte hian ṭangrual sorkar siam dan ngaihtuahin hun rei tak inbiakna an nei tawh a, inremna an siam thei dawn ta a ni.

Ṭangrual sorkar thar hi Christian Democratic Union (CDU) hruaitu Chancellor Angela Merkel-in a kaihruai leh dawn a, he chanvo hi kum 11 chuang a lo chelh tawh a ni. CDU hian ministry pawimawh–economics, defence, agriculture leh education an chang dawn a ni.

SPD hotu Martin Schulz chu foreign minister-ah dah a ni dawn a, Hamburg mayor Olaf Scholz chu finance minister-a dah a nih rin a ni bawk. CSU huraitu Horst Seehofer chu interior ministry chantir a ni dawn a, hei bakah hian transport, digital affairs leh developmental aid department pawh an chang tel dawn a ni.