Bangladesh : Zia-i thlawptuten lungawi lohna lantir chhunzawm

Bangladesh court-in an ram prime minister hlui Khaleda Zia-i chu eiruk thubuaiah thiam loh chantirin kum nga tang turin a hrem a, hei vang hian Zia-i thlawptute chuan ram khawpui hmun hrang hrangah lungawi lohna lantirin buaina an chawk chhuak.

Bangalesh Nationalist Party (BNP) hruaitu Zia-i hian thiam loh chantir a nih chungchang hi court sang zawkah khin let a tum a, mahse court thutlukna lo siam tawh hian December thlaa an ram inthlanpui neih tura a chuh ve tumna a nghawng buai thei dawn a ni.

Ningani-a Dhaka court-in thiam loh chantir a, hremna tur a puan hnuah Zia-i hi special jail-ah hruai nghal a ni a, a ukil-ten appeal-na an thehluh hma chu he hmunah hian a awm rih ang.

BNP general secretary Fakhrul Islam Alamgir chuan PM hlui chunga court thutlukna siam chu thil dik lo a ni tih sawiin, court rorel dan chu an pawm theih loh thu a sawi. Zia-i ukil, Khandkar Mahbuh Hossian pawhin politics hmanga phuba laktumna a ni tiin, court sang zawka an appeal hunah he thutlukna hi tihdanglam a ni leh ngei dawn a ni, a ti.

BNP member-te chu court rorel dana lungawi loin hmun hrang hrangah buaina an chawk chhuak a, police leh rorellai party mi leh sate nen pawh an innawrbuai hle a ni. BNP member-te nena innawrnaah police officer panga-in hliam an tuar a, police motorcycle pahnih pawh halsak a ni bawk nia sawi a ni. Police-te chuan eptu member leh official 3,500 vel an man tawh bawk.

Kum 72 mi, Zia-i hi Bangladesh Prime Minister Sheik Hasina-i nena thawkdun ṭhin, a hnua inhmelhma zui ta an ni. Zia-i party hian kum 2014 inthlan kha an boycott a, mahse kumin inthlanpui neih turah chuan chuh an tum thu an sawi tawh a ni. Kum 2007 khan Zia-i leh a fapa Rahman-te chuan sipai thlawp sorkar chuan eiruk thubuaiah a lo man tawh a, kum khat leh a chanve an tang a ni.