Khawvel-ah kar khat chhungin hri kai thar mtd 3.4 awm : Hri vanga thi leh variant thar hmuhchhuahna ram pung zel
Khawvel pumah Covid-19 hri kai an tlakhniam hnuah, tun hnaiah ram hrang hrangah hri kai an pung thar leh.
World Health Organisation (WHO) chuan kartina report a tihchhuahah, kar liam ta chhung khan khawvel pumah hri kai thar maktaduai 3.4 hmuh chhuah an awm tih a tarlang. Kar khat chhung hian nitin hri kai thar 4,90,000 awm ziah ang a ni a, a kar hmasa leh khan nitin hri kai thar 4,00,000 awm ziah ang a ni thung.
Kar liam ta chhunga hri kai thar punna hi 12% zet a ni tih sawiin, WHO chuan Covid-19 kai thar an pun bakah, hri vanga thi pawh an pung chak chho leh hle tih a sawi. Kar liam ta chhunga hri kai hmuhchhuah tamna ram te chu Indonesia, Britain, Brazil, India leh US-te an ni.
Hemi hun chhung vek khan hri vanga thi 57,000 an awm belh leh a, khawvel pumah hri vanga thi hi maktaduai li chuang an awm tawh.
Covid-19 variant thar pawh hmuhchhuah belh zel niin, ram/territory 180-ah Alpha variant hmuhchhuah a ni tawh a, hetihlai hian ram/territory 13 ah Delta variant hmuhchhuah belh leh a ni bawk.
Hmun hrang hranga hri kai pun chak lehna chhan chu variant thar, Covid-19 inkaihhruaina thlahdul leh coronavirus vaccine la dawng ve lo tam tak an la awm vang nia ngaih a ni.
WHO chuan kum 2021 ral hma ngeia an ram mipui 40% tal vaccine pe hman turin ram tinte a ngen. Hetih lai hian khawvela vaccine dose tluklehdingawn thum siamchhuah tawh zinga 1% vel chiahin ram rethei zawkte hi a la thleng thung.