Hong Kong police-ten Apple chanchinbu senior editor hlui man

Hong Kong police-te chuan Nilaini khan pro-democracy chanchinbu tihtawp tak, Apple Daily senior editor hlui, Lam Man-chung an man.

Kum 52 mi, Lam Man-chung hi Apple Daily-ah hian executive editor-in-chief a ni ṭhin a, police-te chuan Nilaini khan an ram himna tiderthawng thei zawnga ram dangte thawhpuiah puhin an man a ni. Kum 2020, June thla aṭang hman ṭan, National Security Act hnuaiah he chanchinbua thawk zinga pakua chu man an ni ta a ni.

June 17 khan police-te chuan newspaper office hi an lo dap tawh a, hard drive leh laptop-te an laksak a ni. Hei bakah hian Apple Daily hminga awm, US dollar maktaduai 2.3 hu chu khawih chet theih lohin an hreksak tawh bawk. Hei vang hian he chanchinbu hi tihtawp a ni a, June 24 khan a tawpna tur tihchhuah a ni ta a ni.

Apple Daily hi Hong Kong-a democracy tundin thlawptu niin, Hong Kong leh China sorkar rorel dan leh policy sawiselnate huai takin an chhuah ṭhin. Hei vang hian thuneitu lam ngaimawh a hlawh hle. Chanchinbu neitu, Jimmy Lai pawh man ni tawhin jail-ah a tang mek a ni. Lai bail dilna hi hnawl a ni a, thubuai siamsakah thiam loh chantir a nih chuan dam chhung tang tura hrem theih a ni ang.