China-in Britain chhang let

China chuan a hmaa Britain-in a lo vau tawhna chu chang letin, Chinese foreign ministry thupuangtu Zhao Lijian chuan an ramchhung thilah Britain chu inrawlh lo turin leh a rang thei ang bera inthiar fihlim turin a ngen.

Nilaini khan British prime minister Boris Johnson chuan China-in Hong Kong-a national security law thar a hman chuan, an rama pemte tana dan hman mek, Immigration Rules chu thlak danglam a tum thu a sawi a ni. National security law hman a nih chuan Hong Kong mite tan Johnson chuan UK citizenship awlsam taka neih theih dan tur siam a nih tur thu a sawi bawk a ni.

Lijian chuan Britain chu Cold War rilru thlak tawh turin leh, mi ram an awp ṭhin laia an rilru put hmang chu thlak tawh turin a duh tih a sawi. Hong Kong leh China inkar chu China ram chhung thil a nih avangin pawn lam inrawlh a rem lo a ni, a ti.

Kum 1997 aṭanga China thuneihna hnuaia inrelbawlna hrang nei, Hong Kong-ah hian vawi tam tak tualchhung buaina, inlakhran duhna leh hel chet 

ṭhinna nuaibo a nih theih nan, China chuan national security law hman a tum a ni. He law hi Hong Kong mipuite chuan duh lohin, an zalenna rahbehsakna tura an ngaih avangin nawrh pawh an huaihawt fo tawh.

US leh Britain chuan Hong Kong-a China hmalakna hi an dem hle a, Hong Kong thuneihna neih chu China chuan laksak a tum tiin an puh ve ve a, he law hian Hong Kong mite zalenna a rapbet thei a ni an ti.

Hong Kong mi 3,50,000 chuan British National (Overseas) passport an nei mek a, midang mi maktaduai 2.5-in he passport hi an apply thei a, he passport kaltlang hian visa tel loin Britain-ah thla ruk chhung an awm thei a ni. 

An awm hun chhung tawp tawh mah se he passport hi thla ruk dang leh an renew leh thei bawk. Johnson chuan he passport kaltlanga hnathawka awmte tan chuan UK khua leh tui nihna neih theihna a awm tih a sawi a ni.