Europe-ah puitling 50% chuangin Covid vaccine dose kimin la tawh: EU

European Union chuan Ningani khan Europe-a cheng maktaduai 200 chuangin (puitling 50% aia tam) Covid-19 vaccine dose kimin an la tawh tih a sawi. Mahse kumin nipui hmaa puitling 70% chin vaccine pek hman a tum chu tihlawhtling thei ta lo a ni.

European Commission thu­puangtu Dana Spinant chuan, "Puitling 54.7% te chuan dose kimin Johnson and Johnson vaccine an la tawh a ni," tiin European Centre for Disease Prevention and Control (ECDC) data thar ber behchhanin a puang. Dose khatna la tawh chu 68.4% an tling tawh tih a sawi bawk.

ECDC Covid-19 vaccine tracker tarlan danin an member ramah vaccine hi dose 4,37,842,446 pek chhuah tawh niin, heng zinga dose 3,71,127,468 te ram hrang hrangte mipui hnenah an semchhuak tawh a ni.

Data-a lan danin puitling (kum 18 chunglam) 2,12,732,730 te'n vaccine dose khatna an la tawh a, dose kima la mi 1,67,310,628 an awm tawh bawk.

"Khawvel hmun tam tak nena khaikhinin vaccine semchhuak tam pawl kan ni ta a, mahse hri inkaidarh leh inthlak danglam zel tur venna atan vaccine hi ram hrang hrangten rualkhai taka kan pek a ngai a ni," tiin Spinant chuan a sawi.

EC president Ursula von der Leyen chuan tun thla tir khan EU ramten July ral hma ngeia puitling 70% an pekchhuah theih nan a daih tur vaccine hi an thawn chhuak tawh tih a sawi. Thawn chhuah belh zel a nih tur thu a sawi bawk. Hemi rual hian Covid-19 chu do hneh a la ni lo a, hri leng vanga buaina lak ata chu thawhhona ṭha nen an la talchhuah ngei tur thu a sawi a ni.

European Commission chief chuan kumin chhungin ram rethei leh ram ṭhanglai te tan EU chuan vaccine dose maktaduai 200 chuang semchhuah a tum tih a sawi. "Team Europe chuan khawvel hmuntina hripui leng mek ṭanpui turin mawh­phurhna a la a ni. Vaccine semchhuah hi a pawimawh ber a, chuvang chuan khawvel hmun tinah Covid-19 vaccine hman mai theih tura a awm a pawimawh hle. Kumin chhung hian ram rethei leh ṭhanglai tan dose maktaduai 200 chuang kan thawnchhuak dawn a ni," a ti.

May thla tir khan vaccine mamawh zual ram tan COVAX programme kaltlangin dose maktaduai 100 aia tlem lo pekchhuah an tum tih EC President hian a sawi a, mahse a thupuan hnuhnung berah EU-in a semchuah tura an sawi zat (goal) hi khum ngei an tum leh tih a sawi.