Afghanistan-ah civil mi 100 chuang thah an ni : State sorkarin Taliban firfiakte tihah puh

Afghanistan-a Kandahar province-a Spin Boldak district-ah silai keng tu tih hriat loh ten civil mi 100 chuang an that tih nimin khan Tolo News chuan a sawi. He province hi Taliban ho thununna hnuaiah awm a ni.

Ministry of interior chuan Spin Boldak-a civil mite thattute hi Taliban firfiakte niin a puh a, chhan leh vang awm loin an pawng kah niin a sawi.

"Firfiak pawlte hian an hotute thupekin Spin Boldak-a Afghan mite in an rawksak mai bakah pawisawi lo mi 100 an that a ni," tiin ministry of interior thupuangtu Mirwais Stanekzai chuan a sawi a ni.

Afghan security agency-te chuan Spin Boldak-ah hian mitthi ruang ṭhahnem tak te chu an la let rem rum niin a sawi. "Taliban-te rawng taka mipuite an thah bakah, sorkar office leh mimal chenna inte rawkin, public infrastructure te pawh an tichhia a ni," tiin ministry of defence thupuangtu Rohullah Ahmadzai chuan a sawi.

Taliban thupuangtu Zabihullah Mujahid erawh chuan an puhna te hi a pha thung.

Taliban-te hian kar hmasa khan security force-te kut aṭangin Spin Boldak hi an chhuhsak a, khawpui chhungah firfiak pawl mi leh sa tam tak hmuh an ni.

Pentagon press secretary John Kirby chuan Ningani khan Kandahar-a Taliban leh Afghan sorkar sipaite inbeihnaah, Afghan sipaite puiin US sipaite chuan ṭum eng emaw zat thlawhtheihna hmangin beihpui an thlak tih sawiin, airstrike an neih dan erawh chipchiar taka sawichhuah a tum lo tih a sawi.