WHO-in hydroxy- chloroquine trial leh dawn
World Health Organisation (WHO) chuan coronavirus veite enkawlna atana malaria damdawi, hydroxychloroquine hman chu a tihtawp lailawk hnuah, he damdawi hi hri kaite enkawlna atan hi an enchhin chhunzawm a ni leh dawn tih a sawi.
Medical journal, Lancet leh New England Journal of Medicine chuan hri veite enkawlna atana hydroxychloroquine hman chu a him em tih zawhna an lo siam tawh a, hei vang hian May 25 khan WHO chuan hydroxychloroquine clinical trial neih mek chu enfiah leh phawt turin tihtawp lailawk a nih thu a puang a ni.
Mahse Nilaini khan trial hi thlak danglam a ngaih loh thu sawi lehin, hman chhunzawm a ni leh dawn tih WHO chuan a tarlang.
WHO chief scientist, Soumya Swaminathan chuan tunah chuan hri enkawlna atana he damdawi hman avanga thihna a thlen tam phah leh phah loh chungchangah danglam a awm lo tih an hrechiang tawh tih sawiin, trial hi inringtawk takin an nei chhunzawm leh thei dawn tih a sawi.