Khuahkhirhna dan siam duh loin ram hrang hrangah nawrh huaihawt

Khawthlang ram hrang hrangah sorkarin Covid-19 hri leng vanga khuahkhirhna dan a siamte duh loin mipuiten nawrh an huaihawt.

Inrinni liam taa nawrh huaihawtna zingah hian Australia, France, Italy leh UK-te an tel. Mipuite chuan zalenna an duh tih thu ziakte an keng a ni.

France president Emmanuel Macron-a'n an rama restaurant leh vantlang hmuna Covid vaccine la la lote tana khuahkhirhna a siam duh lohna lantirin ram pum huapin lungawi lohna hi an lantir, sorkarin 'health pass' a siam chu an dem thu sawiin an zalenna palzut sakna niin an sawi. Paris khawpuia pungkhawmte chu police-te tear gas hmangin an hnawtdarh a ni.

Italy-ah pawh thla leh aṭanga hman tur, restaurant leh cinema hall bakah indoor activity ti turten vaccine a la tawh ngei tih lantirna, green pass hman tum chu duh loin nawrh huaihawt a ni bawk. Rome, Naples leh Turin-ahte mipui pungkhawmin, an zalenna rahbehsak an duh loh thu an sawi.

London-ah pawh mi tam takin sorkarin track and trace app a hman chu duh lohna an lantir a, he app hmang hian an chet vel dan chhuiin, kar khat chhungin mi nuai ruk chuang chu inkhunghrang tura tih an ni. England-ah hian khuahkhirhnate chu hlih deuh vek ni tawh mah se, sorkar hian track and trace app hi a hmang thung a ni.

Sydney, Australia-ah pawh sorkarin pawn chhuah khapna thupek a siam chu duh loin mi tam takin lungawi lohna an lantir. Police-te chuan nawrh huaihawt zingah mi 57 manin, mi 100 dawn chu pawisa an chawitir. Melbourne-ah pawh mi paruk man an ni bawk.