Uganda-a MP-te motor leina tur pek vangin buaina chhuak

Uganda sorkarin Members of Parliament (MP)-te motor leina atana $ mtd 30 a pek avangin Uganda mipuiten lung­awi lohna nasa tak an chhawk chhuak.

Coronavirus leng vanga ram rethei tak ni tawh chunga harsatna nasa tak an tawh belh laia, motor leina tura heti zat sum pek chhuah a nih avang hian mipuite hi an lungawi lo hle.

MP 529-te chuan motor leina tur hian shillings maktaduai 200 ($56,500) ṭheuh an dawng a ni.

June 18 khan president Yoweri Museveni chuan hri leng vangin mipui chetvelna te, school, biakin leh bar te chu kar ruk dang khar leh turin thupek a tichhuak. Mipuite khuahkhirhna tur siam a nih hnuah MP-te motor leina tur sum tam tham tak hi pek chhuah a ni leh thung a ni.

"Sorkarin Parliament member tlemte tana car manto tak a leisak tur hi kan pawm thei lo a ni. Heng MP-te hian thla tinin hlawh shillings maktaduai 30 ($8,000 vel) chuang an la reng bawk. Hetih lai hian ram mipui tam zawk chu eikhawp pawh nei loin an awm mek thung," tiin human rights defender leh Union of Human Rights Defenders Uganda executive director, Anet Nana Namata chuan a sawi.

Uganda-a nitin inhlawhfate te hian a tlangpuiin thlatin $28 an hlawh laiin zirtirtu te chuan $75 an hlawh thung a ni.

National NGO Forum hotu Moses Isooba chuan, "Sorkarin Covid-19 hripui leng karah mipui hnena ṭanpuina a dil laia heti zawnga a che ta mai hi zahthlak kan ti hle. Heng pawisate hi a mamawh mi 5,00,000 hnenah pek ni zawk rawh se," tiin a sawi.

Mipuiten lungawi lohna an lantir lai hian sorkar thupuangtu Ofwono Opondo chuan an thuthlukna siam chu thuthlukna dik tak a nih thu leh hun kal tawha an ram tihdan phung pangngai a nih thu a sawi thung. "Electorate nena kan thawhhona tiawlsam tura ruahman a ni. Civil society organisation-te chu budget siamnaah an tel avangin, MP-te hian motor leina tur pawisa an dawng dawn tih an hre lawk vek a ni," a ti.

Hetiang tho hian kum 2018 khan buaina lian tham tak a lo chhuak tawh a, activist-te Parliament kawtah pungkhawmin lungawi lohna an lo lantir tawh a ni.

Mi maktaduai 45 chenna Uganda-ah hian Covid-19 kai hmuh chhuah mi 91,710 an awm tawh a, hri vanga thi 2,496 an awm tawh bawk.