Brazil mipuite'n President Bolsonaro bang turin phut

Brazil rama khawpui hrang hrangah Inrinni liam ta khan an ram president Jair Bolsonaro bang tura phut mipuiten nawrh an huaihawt leh. Brazil rama hripui leng a hmachhawn danah President hian sawisel a hlawhin, a eiru ni ngeia an puh avangin amah duh lotu ṭhahnem tak chuan bang turin an phut a ni.

Inrinnia nawrh huiahawt hi tun thla chhunga President Bolsonaro duh lohna lantira khawpui hrang hrangah nawrh huaihawt ṭum hnihna a ni bawk.

President Bolsonaro rorelna hnuaiah, Brazil ram hi khawvela Covid-19 hri leng tuar nasa ber ram zingah a tel mek a ni. Hripui vang hian mi nuai 5 chuang an thi tawh. President hian hri len tirh aṭangin Covid-19 hri chu hri hlauhawm tak ni lo nia sawiin, invenna atana mask vuah leh social distancing dan siamte chu a dodal reng a ni.

India rama Covid-19 vaccine siam lei danah thil fel tawk lo awmah President hi Senate chuan a chhui mek bawk.

Bolsonaro duhtu hi an tlahniam chak hle a, mipui ngaihdan lak hnuhnung berah President tana duhtu hi 24% vel chauh a ni tawh. Hei vang hian October thlaa President thlanna neih turah pawh a khingpui tur, Workers Party hruaitu leh president hlui Luiz Inacio Lula da Silva chu a hneh zo loh a rinawm tawh hle a ni.Workers Party hi ram chhung khawpui hrang hrangah Bolsonaro duh lohna lantira nawrh huaihawtna a hma la tur ber a ni.